872 Общее количество просмотров,  3 Просмотров сегодня

        Өрөспүүбүлүкэбитигэр Ийэ сылын чэрчитинэн Улахан Аан олохтоох бибилэтиэкэтин иһинэн үлэлиир “Көмүлүөк” түмсүү, ыаллыы сытар Булгунньахтаах нэһилиэгин “Айылгы” уонна “Ситим”  түмсүүлэрин  ыҥыран, “Ийэҕэ махтал” тэрээһини ыытта. Күндү ыалдьыттары арыылаах алаадьынан, саамал кымыһынан айах туттулар. Икки өттүттэн холбоон иис-уус быыстапкатын  туруордулар. Сөҕүмэр кэрэ көстүүлээх оҥоһуктар хараҕы сымнаттылар. Норуот маастардара Булгунньахтаахтан Альбина Решетникова, Улахан Аантан Светлана Павлова үлэлэрэ быыстапканы киэргэттилэр. Түмсүүлэр кэрэ аҥардара бары да илиилэригэр талааннаахтара көһүннэ. Салҕыы түмсүүлэр салайааччылара Рыгунова Зинаида Федоровна, Ким Альбина Дмитриевна, Македонова Вера Алексеевна түмсүүлэрин туһунан сырдаттылар, махтал тылларын эттилэр, эҕэрдэ нүөмэрдэри көрдөрдүлэр. “Комулуоктэр” күндү ыалдьыттарыгар бэйэлэрэ тикпит кыбытыктаах тигиилээх харысхалларын бэлэх ууннулар. Ийэ сылынан “Малдьаҕар 2-с нэһилиэгэ” МТ аатыттан элбэх оҕолоох, көхтөөх позициялаах түмсүү ийэлэригэр Апросимова Любовь Алексеевнаҕа, Григорьева Варвара Алексеевнаҕа, Алексеева Марфа Ивановнаҕа эҕэрдэ сурук туттарылынна. Маны таһынан “Көмүлүөк” түмсүү бэйэтин сэмэй бэлэхтээх эҕэрдэ суруктарын Алексеева Варвара Иннокентьевнаҕа, Иванова Зинаида Семеновнаҕа, Степанова Валентина Петровнаҕа, Андреева Людмила Андреевнаҕа туттарда. Минньигэс астаах остуол тула ирэ-хоро кэпсэтии, көр-нар, үҥкүү-битии, ырыа-тойук буолла. Айылгы түмсүүттэн Антонина Петрова саха народнай суруйааччыта Бүөтүр Тобуруокап “Хаар” поэматын ис сүрэҕиттэн  ааҕан истээччилэр астыныыларын, дохсун ытыс тыаһын ылыан ылла.  Ылбаҕай ырыалаах, хомоҕой хоһоонноох, эҕэрдэ тыллаах тэрээһини бары “Тойон-Арыы” ырыаны бииргэ ыллаан түмүктээтилэр. Кэлбит ыалдьыттар үөрэн-көтөн тарҕастылар.