196 Общее количество просмотров,  1 Просмотров сегодня

Быйыл Өктөмнөөҕү норуодунай тыйаатыр тэриллибтэ 20 сылын туолла. Тыйаатыр үбүлүөйүгэр анаан “Тыйаатырдыын алтыһан” диэн ахтыы- кинигэ күн сирин көрдө.
Өктөмҥөөҕү норуот тыйаатыра арыллыыыта Өктөм нэһилиэгин историятын биир кэрчигэ буолар. Тыйаатыр СӨ бастакы президена М.Е. Николаев көҕүлээһининэн арыллыбыта.
Бастакы режиссерынан Екатерина Ивановна Корякина, худуоһунньугунан Григорий Григорьевич Иванов үлэлээбиттэрэ. Бастакы испэктээкил Тимофей Сметанин “Лоокуут уонна Ньургуһун» айымньытын сыанаҕа туруоруллан, көрөөччү үрдүк биһирэбилин ылбыта.
Онтон ыла 20 сыл тухары араас испэктээкиллэр, көрдөөх сценкалар туруоруллан, элбэх киһи оонньоон, талаана арылынна. Өктөмнөөҕү тыйаатыр билигин республика биллэр-көстөр айар коллективтар ахсааннарыгар киирдэ.
Бу үөрүүлээх күн Өктөмнөөҕү модельнай бибилэтиэкэ үлэһитэ Матрена Павлова “Тыйаатырдыын алтыһан” кинигэни ырытыытыттан саҕаланна. Кинигэни Өктөмнөөҕү норуодунай театр режиссера Зоя Егоровна Аржакова, «Барҕарыы» киин директора Федора Ивановна Фомина, киин специалистара,Сахая Руслановна Готовцева сүүрэн-көтөн, ахтыы хомуйан таһаартарбыттар.
Киирии тылы Федора Ивановна Фомина суруйбут, тыйаатыр арыллыаҕыттан күн бүгүҥҥэ диэри туох ситиһиилээх кэлбитин киэҥник арыйбыт. Кинигэҕэ тыйаатыр бастакы үлэһиттэрэ уонна кэлин үлэлээбит артыыстар ахтыылара киирбит. Хас биирдии ахтыы артыыстар бэйэлэрэ оонньуу сылдьыбыт кэмнэрин сырдатар буолан, сыаналаахтар уонна хатыламматтар. Суруллубут суоруллубат диэн этэллэр, онон манна киирбит ахтыылар тыйаатыр историятын кэрэһэлииллэр.
Кинигэ «Дани Алмас» кинигэ кыһатыгар 2022 сыллаахха 60 экземплярынан, 141 страницалаах, олус үрдүк хаачыстыбалаах кумааҕыга бэчээттэммит. Элбэх хаартыска ааҕааччы боломтотун тардар.
Маннык ис хоһоонноох кинигэлэр кэлэр кэнэҕэски ыччаппыт нэһилиэктэрин историятын үөрэтэллэригэр көмө, холобур буолаллар. Төһөннөн күн -дьыл ааһар да, кинигэ суолтата үрдээн иһэр.
Матрена Егоровна кинигэ тахсыытыгар үлэлээбит автордарга , ахтыы суруйбут бары артыыстарга нэһилиэкпит театрын историятын сэгэппиттэригэр махтал тылын уонна итии-истиҥ эҕэрдэтин тиэртэ.

Максимова Надежда Егоровна

Поделиться: