1,418 Общее количество просмотров,  5 Просмотров сегодня

     Биһиги, Бөртөлөр, былыр-былыргыттан күн бүгүнүгэр диэри Дьөһөгөй оҕотугар – сылгыга сүгүрүйэн кэллибит. Киһиэхэ ат миинэр миҥэ, көлүллэр көлө, уһун айаҥҥа аргыс-доҕор буоларын таһынан, этэ – сандалыга ууруллар мааны ас, үүтэ – сырдьыгыныы көөнньөр кымыс, тириитэ – ичигэс таҥас-тэллэх, мааны олбох, сиэлэ, кутуругун кыла – дьикти өҥүнэн дьэрэлийэр соруо, дэйбиир буолар.

   Бэс ыйын 15 күнүгэр Улахан Ааҥҥа биир ураты тэрээһин буолан ааста.  Ол курдук, бибилэтиэкэ иһинэн үлэлиир “Көмүлүөк” түмсүү нэһилиэккэ анаан ат толору симэҕин оһуордаан-мандардаан тигэн бэлэх уунна. Бу-нэһилиэкпитигэр туохха да кэмнэммэт сыаналаах кылаат буолар. Тэрээһини иилээн-саҕалаан ыытта Римма Черемкина, кулууп иһинэн үлэлиир түмсүүлэр салайааччылара. Тэрээһин Улахан Ааҥҥа киириигэ “Улахан Аан” стелла аттыгар баар Дьөһөгөйгө аналлаах оҥоһукка буолла.

   Аан тыл кэнниттэн олохтоох мелодиспыт  “Таптыыр сирим Улахан Аан” ырыатынан бар дьонун э5эрдэлээтэ. Ат симэҕин ойуутун ис хоһоонун Кононова Зоя Афанасьевна алгыстаах тойугунан сырдатта. Түмсүү салайааччыта Македонова Вера Алексеевна тыл эппитин кэннэ, “Көмүлүөк” түмсүү эбэлэрэ Малдьаҕар 2-с нэһилиэгэ МТ аҕа баһылыгар Александр Степанович Алексеевка үөрэн-көтөн туран туттардылар. Александр Степанович нэһилиэк дьонун-сэргэтин аатыттан махтал тыл эттэ. Бу сиэдэрэй комплект тэриллэ  сылдьар “Дьөһөгөй оҕото” түмэлгэ туттарылынна. “Көмүлүөктэр” эҕэрдэ ырыаларын кэннэ, нэһилиэкпит кылыһахтаах тойуксута, оһуохайдьыта  Иванова Зинаида Семеновна оһуохай тылларын таһаарда. Бэтэрээн учуутал Стручкова Елизавета Терентьевна “Көмүлүөктэр” сыралаах үлэлэрэ түмүктэммитинэн эҕэрдэлээн тыл эттэ, хоһоон аахта уонна оһуохай таһаарда. Хаартыскаҕа биир дойдулаахпыт Григорьев Владимир Моисеевич түһэртээбитэ. Олус үчүгэй хаачыстыбалаах, ис хоһоонноох хаартыскалары түмсүү олус астынна, Владимир Моисеевичка махталларын этэллэр.

Тэрээһинтэн дьон сүргэлэрэ көтөҕүллэн тарҕастылар. “Көмүлүөк” түмсүү тикпит ат симэҕэ үйэлээх буоллун диэн алгыспытын этэбит!

Альбина Трифонова

Улахан Аан олохтоох бибилэтиэкэтин үлэһитэ