721 Общее количество просмотров,  2 Просмотров сегодня

Быйыл алтынньы ый 29 күнүгэр Комсомол төрүттэммитэ 105 сылын бэлиэтиэхпит. Бүгүн, ааҕааччыларга анаан, оруобуна 80 сыл аннараа өттүгэр, Комсомол 25 сылын көрсө улууспут хаһыатыгар тахсыбыт ыстатыйалары таһаарабын. 1943 сыллаахха алтынньы 29 күнүгэр «Советтар Знамялара» хаһыаттан ааптардар суруйууларын уларыппакка бэчээттэннэ.

Комсомол ииппит уола, хорсун байыас

Ленин-Сталин комсомолун боевой кэккэтигэр иитиллибит Иннокентий Прокопьевич Никифоров 1942 с. кулун тутар 3 күнүгэр Кыһыл Армия кэккэтигэр ыҥырыллыбыта. Кини фроҥҥа барар күнүгэр доҕотторугар эппитэ: «Мин бүгүн советскай народум көҥүлүн, чиэһин уонна тутулуга суох буолуутун иһин немецкэй талабырдьыттары урусхаллыыр охсуһууга барабын. Өһөгөйдөөх өстөөҕү үлтүрүтүүгэ өлөртөн куттаммакка боевойдук сылдьан партия правительство сорудахтарын чиэстээхтик толоруохтаахпын. Мин түөспэр илдьэ сылдьар комсомолум бэлиэтэ эр хорсун санаалаах буоларга үөрэтэр» диэбитэ.

Иннокентий Прокопьевич Кыһыл Армия кэккэтигэр ыҥырыллаат пулеметнай отделениеҕа байыаһынан сырыттаҕына отделения командирын солбуйааччынан анаабыттара. Кини онно туйгун дисциплинэтин уонна дьоҕурдарын көрдөрбүтүн иһин хаста да рота командирын махталын ылбыта уонна рота командирын солбуйааччынан өрө ытыарыллыбыта. Ити үлэҕэ сырыттаҕына комсомолец Никифоровы лейтенант куурсугар командировкалаабыттара, онно 3 ый үөрэнэн, үөрэҕин туйгуннук бүтэрбитэ уонна лейтенант аатын ылбыта. Кини байыастар уонна командирдар ортолоругар улахан авторитеттааҕын иһин бастаан взвод командирынан, онтон рота командирынан анаммыта. Сотору буолаат бэйэтин ротатын илдьэ фроҥҥа барбыта.

Фронт инники линятыгар боевой соругу толоро сылдьан Иннокений Прокопьевич баас ылан госпиталга эмтэнэ 1943 с. атырдьах ыйын 28 күнүгэр убайыгар маннык ис хоһоонноох суругу ыыппыта:

«Тапталлаах убайым Исай Прокопьевич!

Аан бастаан Кыһыл Армия кэккэтигэр сылдьар бииргэ төрөөбүт бырааккыттан боевой офицерскай приветтэ ыл!

Күндү убайым! Эн итии кыһамньыгынан иитиллэн, улаатан, үөрэнэн Кыһыл Армия кэккэтигэр сулууспалыыр уонна советскай лейтенант аатын ылар дьоллоннум. Фронт инники линиятыгар төрөөбүт ийэ дойдум көмүскэлигэр сылдьан, бэйэм сатабылым уонна хорсун сырыым иһин правительствоттан «Кыһыл сулус» орденынан наҕараадаланным. Мин билигин БСК(б)П членэбин. Ити барыта Эн, мин туспар кыһаммытыҥ түмүгэ буолар. Ол иһин бүгүн эйиэхэ махталбын тиэрдэбин.

Ытыктыыр убайым! Ыраах тыылга оргуйар үлэҕит туһунан суруйуҥ. Эҕэрдэни кытта эн быраатыҥ И. Никифоров. 28. 8.43с.»

Иннокентий Прокопьевич ити суругун кэнниттэн сотору эмтэнэн үтүөрэн фроҥҥа иккиһин барбытын туһунан биллэрбитэ.

Биһиги оройуон комсомолецтара уонна ыччаттара комсомол XXV сааһа туолар үбүлүөйүгэр комсомолец И.П. Никифоров немецкэй талабырдьыттары урусхаллааһыҥҥа боевой суоллары сылдьан «Кыһыл сулус» орденынан наҕараадаламмытынан киэн тутталлар. Биһигини Иннокентий Никифоров эрдээх хорсун сырыылара партия правительства сорудахтарын туйгуннук толорорго ыҥырар.

Н.Прокопьева.

Оскуолаттан фроҥҥа

Устин Маркович Асекритов аҕыйах намыын саҥалаах, куруук үөрбүтүнэн сылдьар сэмэй, көрсүө оҕо этэ. Кини сыл аайы туйгуннук үөрэнэн Покровсайдааҕы орто оскуола 10 кылааһын бүтэрбитэ. Үөрэнэ сылдьан Ленин-Сталин комсомолун кэккэтигэр киирбитэ.

Киһи аймах дьолун быспыт гитлеровскай талабырдьыттар Устин үөрэҕин салгыы үөрэнэр баҕатын эмиэ быспыттара. Устин Маркович 1942 сыллаах сайын төрөөбүт Ийэ дойдутун көмүскүү Кыһыл Армия кэккэтигэр ыҥырыллан барбыта. Кини кылгас бириэмэҕэ үөрэнээт фронт инники линиятыгар Аҕа дойду боевой сорудаҕын толоро барбыта.

Устин Маркович от ыйын 26 күнүгэр Е. куораттан убайыгар сурук ыыппыта.

«Убааһылыыр убайым Николай Маркович! Бэйэҥ ииппит, үөрэппит бырааккыттан боевой приветтэ тут!

Мин бэрт үчүгэйдик сылдьабын. Төрөөбүт Ийэ дойдум көмүскэлин иһин гитлеровскай ороспуонньуктары утары харысхала суох охсуһан, фронт боевой сорудаҕын чиэстээхтик толорбутум иһин от ыйын 14 күнүгэр правительстванан «Боевой үтүөлэрин иһин» медалынан наградаланным. Фроҥҥа сылдьан Ленин-Сталин комсомолуттан БСК(б)П кэккэтигэр членинэн киирдим. Эһиги ыраах тыылга олорор дьоннорум төрөөбүт Ийэ сирбитин, бырааттыы народтарбытын босхолуур иһин фронт интереһигэр бас бэриннэрэн боевойдук үлэлээҥ.

Эҕэрдэни кытта эн быраатыҥ Устин Асекритов.»

Комсомол XXV сааһын чиэһигэр Устин Асекритов фроҥҥа боевой үтүөлэрин ситиспитин курдук бары комсомолецтар уонна ыччаттар үөрэниэх, үлэлиэх тустаахтар.

                  Н.Г.

Уоттаах сэриигэ сылдьыбыт эдэркээн комсомол уолаттар Ийэ дойдуларыгар бэриниилээхтэрин, кыайыыга эрэллээхтэрин кылгас суруктарыттан көстөр.

 

 

Сурукка тистэ Хоточчу бибилэтиэкэтин үлэһитэ Лира Яндреева.

Поделиться: