578 Общее количество просмотров,  3 Просмотров сегодня

Төрөөбүт тыл уонна сурук- бичик күнүгэр аналлаах Төхтүр нэһилиэгэр сылын аайы ыытыллар“Ийэ тылынан иитэбит, саха тылынан сайдабыт” фестиваль буолла.
Олунньу 10 күнүгэр нэһилиэк бибилэтиэкатыгар “Сахалыы сканворду таай” күрэх ыытылынна. Манна кыайыылааҕынан омук тылын учуутала Соломонова Елена Ильинична буолла.
Ааҕааччыларга анаан “Саха тыла-саха тыына, дьылҕата” кинигэ быыстапката оҥоһуллубута.
Олунньу 13 күнүгэр А.Д.Широких аатынан оскуола оҕолоро Саха Өрөспүүбүлүкэтин Национальнай бибилэтиэкэтэ, “Оҕо арыллар ааҕар киинэ” ыыппыт “Таптыыр сахам тылынан…” өрөспүүбүлүкэтээҕи акцияҕа кыттыбыттара. Барыта 3 5 оҕо тест оҥорбуттара. 7-8 кылаастарга Лукин Дьулуур бастаан кинигэ бэлэх туппута.
Сарсыныгар “Ийэ тылым барҕа баайым” диэн дьиэ кэргэн күрэҕин А.И.Борисов аатынан “Эркээни”КСК уонна оскуоланы кытта холбоон тэрийбиппит. Күрэххэ Анисимовтар, Руфовтар, Сидоровтар дьиэ кэргэннэрэ «Дьулуруйар Ньургун Боотур» олоҥхоттон сахалыы доргуччу аахтылар, ”Өркөн өй” викторинаҕа төрүт тылы төһө билэллэрин күрэстэстилэр, өбүгэ оонньууларын: кириэс тэбиини, түү мээчиги таба быраҕыыны, оҕуруо тиһиини оонньоотулар. Күрэх түмүгүнэн Анисимовтар дьиэ кэргэннэрэ бастаата. Кыттыылаахтарга барыларыгар бэлэх туттардыбыт. Тэрээһини “Кэскил” норуот ансаабылын кыттыылаахтара хомуска оонньоон киэргэттилэр.
Ити курдук, ийэ тыл күнүгэр аналлаах тэрээһиннэрбит бэрт сэргэхтик буолан аастылар.