541 Общее количество просмотров,  3 Просмотров сегодня

Олунньу 13 күнүгэр, 1 Малдьаҕар нэһилиэгэр Төрөөбүт тыл уонна сурук- бичик күнүгэр аналлаах тыл сүмэтин баһылаабыт Саха Сирин биллиилээх суруйааччыларын кытта истиҥ иһирэх көрсүһүү буолла. Манна кыттыыны ыллылар; биһиги биир дойдулаахпыт Саха норуодунай суруйааччыта Россиятааҕы улахан литературнай бириэмийэ уонна Саха Өрөспүүбүлүкэтин П.А.Ойуунускай аатынан государственнай бириэмийэ лауреата Павел Николаевич Харитонов- Ойуку, прозаик, СР култууратын үтүөлээх үлэһитэ «Чолбон» литературнай сурунаалга өр сылларга эппиэттиир сэкирэтээринэн үлэлээбит Анна Егоровна Варламова- Айысхаана, прозаик Саха Өрөспүүбүлүкэтин бэчээтин уонна ыччакка политикатын туйгуна «Чолбон» сурунаал прозаҕа отделын редактора Данил Николаевич Макеев.
Бастакы чааһыгар Булгунньахтаах орто окуолатын үөрэнээччилэрин кытары «Ийэ тылбыт- барҕа баайбыт» диэн эҕэрдэ түһүлгэтэ ыытылынна. Ыҥырыылаах ыалдьыттар кэс тылларын эттилэр, бэйэлэрин кинигэлэрин оскуола библиотекатыгар бэлэх ууннулар. Тэрээһин кэмигэр ыалдьыттары саха киһитин сиэринэн арыылаах алаадьынан уонна быырпаҕынан күндүлээтилэр. Оскуола үлэһиттэрэ эт, үүт, бурдук аһы астаан оҕо-аймаҕы, ыалдьыттары көбүөрдээх лэппиэскэнэн, сылаас саламаатынан тото-хана аһаттылар. Алын сүһүөх оскуола уонна 5-6 кылаас хоһоон ааҕар уолаттара, 5 кылаас чабырҕахсыт кыргыттара уонна С.П. Ефремов «Ини-бии» драматыттан Николай монологун 11 кылаас үөрэнээччитэ Корякин Володя, «Куорат кыыһа» пьесаттан Маня монологун 11 кылаас үөрэнээччитэ Охлопкова Василина ааҕан көрөөччүлэр биһирэбиллэрин ыллылар. Бүтэһигэр өйдөбүнньүк уопсай хаартыскаҕа түстүлэр.
Иккис чааһыгар «Дьиэрэй ырыа” КК нэһилиэк дьонун кытары көрсүһүү буолла.Төрөөбүт тыл күнүгэр анаан музыкальнай эҕэрдэлэрин тириэртилэр «Айылгы» фольклорнай бөлөх, «Дьүрүһүй» хомусчуттар бөлөхтөрө, литературнай түмсүү «Айар кытыл». Суруйааччылардыын олус үчүгэй аһаҕас истиҥ кэпсэтии буолла, ыйытыыларга- хоруйдар, хоһоон суруйуутугар холонор дьоҥҥо сүбэлэри биэрдилэр. Кыттыыны ылбыт дьоммутугар олохтоох дьаһалта аатыттан махтал сурук, кинигэ бэлэх, ону таһынан библиотека аатыттан сэмэй бэлэх туттарыллынна.
«Ийэ тыл- омук кэскилэ» диэн кинигэ быыстапка туруорулунна, ону тэҥэ ыҥырыылаах ыалдьыттарбытыгар анаан кинилэр айымньыларын сырдатар кинигэ быыстапката тэриллиннэ. Бүтэһигэр бэйэлэрин кинигэлэрин илии баттааһыннаах кэлбит дьоҥҥо ылан атыылаатылар.
Тэрэһиҥҥэ күүс- көмө буолбут дьоммутугар барҕа махталбытын тириэрдэбит. Төрөөбүт төрүт тылбыт үүнэ- сайда турдун диэн алгыс тылларын аныыбыт.

Олохтоох библиотека салайааччыта Анисия Дьяконова.