523 Общее количество просмотров,  1 Просмотров сегодня

Хачыкаат нэһилиэгин библиотеката ыам ыйын 27 күнүгэр Ольга Михайловна Тихонова — Күндүүнэ «Кэрэ иэйиим ымыылара», «Оҕо саас кырдала», «Сахабыт сирин көтөрдөрө уонна кыыллара», «Үөн — көйүүр эйгэтэ. Дьыл кэмнэрин көстүүлэрэ» саҥа хоһооннорун хомуурунньуктарын сүрэхтиир дьоро киэһэ тэрилиннэ. Ольга Михайловна 1990 сыллаахтан Хачыкаатка «Куоласчаан» оҕо уһуйааныгар иитээччинэн үлэлии сылдьар. Үрдүк категориялаах иитээччи, үлэ бэтэрээнэ, амарах ийэ, истиҥ эбээ. 2016 сыллаахха «Тэтим» эколого-литературнай куруһуогун оҕолорун хоһооннрун хомуурунньукка тиһэн «Току- току ньээм — ньээмнэр кыракый күнчээннэр» диэн бастакы кинигэтин ааҕааччыларга бэлэх ууммута. 2018 сыллаахтан нэһилиэк библиотекатын иһинэн үлэлиир «Сыһыы кустуга» айар куттаахтар түмсүүлэригэр дьарыктанар. Иһирэх иэйиилээх хоһоонноро 10 хомуурунньукка киирбиттэрэ. 3 хоһооно ырыа кынаттанан ыллана сылдьаллар. Улууска, республикаҕа ыытыллыбыт хоһоонньуттар конкурстарын хас да төгүллээх кыайыылаҕа. Дьоро киэһэни Любовь Ефимова, Вера Семенова сахалыы үҥкүүнэн арыйдылар. «Куоласчаан» уһуйаан иитиллээччилэрэ хоһоон хомуурунньуктарыттан оҕолорго аналлаах хоһооннору аахпыттарын видеоларын экраҥҥа көрдөрдүбүт. Автор оҕолорго аналлаах хоһоонноро тыллара өйдөнүмтүөлэр, кыра оҕоҕо үөрэтэргэ сөрү-сөп кээмэйдээхтэр. Онтон Хачыкаат орто оскуолатын үһүс кылааһын оҕолоро хоһооннору аахтылар( Кылаас салайааччыта Павлова А.В.). «Сыһыы кустуктара», «Сандаарар ситим» түмсүүлэр, «Куоласчаан» уһуйаан уонна Хачыкаат орто оскуолатын коллективтара автор саҥа хоһооннорун аахтылар, эҕэрдэ тыллары эттилэр, ырыа ыллаатылар, сэмэй бэлэхтэрин туттардылар. Давид Саввинов «Туундара уолун ырыата», Айаал Николаев «Ийэҕэ махтал» диэн ырыалары толордулар. Дьоро киэһэбит айар үлэнэн утумнаахтык дьарыктана сылдьар дьону түмтэ. Ыҥырыылаах ыалдьыттарбыт Г.И.Иванова — Айтыына Уран, И.А.Васильев — Ылдьаа Хоточчу бэйэлэрин хоһооннорун аахтылар, Айтыына Уран икки ырыа кэһиилээх кэлэн ыллаан ааҕааччыларбытын үөртэ. Мохсоҕоллоохтон ааҕааччыбыт саха тылын уонна литературатын учуутала Винокурова К.И., автор эдьиийэ нуучча тылын уонна литературатын учуутала Брызгалова П.А.суруйбут отзывтарын ааҕааччыларга иһитиннэрдибит. Түмүккэ эҕэрдэ тылы Хачыкаат нэһилиэгин МТ дьаһалтатын специалиһа Орестова В.Ф. эттэ. » Сахабыт хоһооно сарсыҥҥылаах буолуутугар баҕарыаххайын! Ытыктыыр хоһоон айааччыларбыт ааттара, айымньылара үйэлэр тухары салҕана турдуннар! Кинигэ үйэлэр тухары өй — санаа, дууһа илдьитэ буола туруо. Ханнык да аныгы технологияҕа таластахпыт ахсын, кинигэ курдук бараммат чиҥ билиини туох да биэрбэт. Оттон кинигэ уонна библиотека — быстыспат өйдөбүл» диэн тылларынан дьоро киэһэни түмүктээтибит. Истиҥ иэйиилээх киэһэни Архипова С.В. иилээн салайан ыытта. Аһылыктаах остуол, хаартыскаҕа түһүүлэр тэрилиннилэр.