574 Общее количество просмотров,  1 Просмотров сегодня

Олунньу 18 күнүгэр 1 Малдьаҕар нэһилиэгэр “Дьиэрэй ырыа” КК, Саха Өрөспүүбүлүкэтигэр Үлэ сылын чэрчитинэн, Хаҥалас улууһугар Тыа хаһаайыстыбатын сылыгар анаан “Дьоһун олох олуктара” диэн кинигэ сүрэхтэниитэ буолла.
Бу кинигэҕэ Хаҥалас улууһун 1 Малдьаҕар нэһилиэгин ытык- мааны ыаллара, холкуос, сопхуос сайдыытыгар үгүс сыраларын биэрэн, элбэх ыччаттары иитэн, үлэһит оҥортоон үйэ аҥаарыттан ордук бииргэ дьоллоохтук олорбут Петров Алексей Васильевич уонна Прохорова Пелагея Ефимовна туһунан оҕолорун, бииргэ үлэлээбит , алтыспыт дьонун истиҥ ахтыыларын хомуйан кэлэр көлүөнэҕэ үтүө холобур буоллун диэн кэпсэниллэр. Ону таһынан улуус архыыптарын докумуоннарыгар олоҕуран төрүччү оҥоһуллубут. Кинигэ таһаарыытыгар үлэлэспит РФ орто уонна уопсай үөрэҕириитин бочуоттаах үлэһитэ, педагогическай үлэ бэтэрээнэ, Петровтар кыыстара, Александра Алексеевна Павлова көҕүлээн, иилээн- саҕалаан, бэчээккэ бэлэмнээн Дьокуускай куораттааҕы Бэчээт Дьиэтигэр бэчээттэннэ.
Үөрүүлээх түгэн арыллыытыгар, СР Тыа хаһаайыстыбатын бэтэрээнэ Петров Алексей Васильевич туһунан сүрдээх үчүгэй, историяҕа хаалбыт, өйдөбүнньүк, көрө- истэ сылдьарга Хаҥалас телевиденията устан хаалларбыт видеосюжета көстүбүтэ.. Кэлбит дьон астына көрдүлэр. Ону таһынан кинигэ ис тутулун туһунан олус үчүгэйдик билсиһиннэрдэ кинигэ ааптара, Петровтар кыыстара, Александра Алексеевна. Эҕэрдэ тыллары эттилэр: 1 Малдьаҕар нэһилиэгин баһылыга Васильева А.И., бииргэ алтыһан үлэлээбит Алексеева В.И, Архипова Р.А, аймахтара, оҕолоро. Дьоро күн кыттыылаахтарын музыкальнай эҕэрдэлэрин тириэртилэр: СР культууратын туйгуна Петр Саввинов уонна кэскиллээх эдэр ырыаһыт Ньургун Давыдов. Түмүгэр Алексей Васильевич саамай сөбүлээн ыллыыр ырыатын “Уоттаах түүҥҥү Дьокуускай” диэн ырыаны караокеннан бары мустубут дьон ыллаатылар. Тэрээһиҥҥэ көмөлөспүт дьоммутугар махталбытын тириэрдэбит.

Олохтоох библиотека салайааччыта Анисия Дьяконова.