651 Общее количество просмотров,  1 Просмотров сегодня

       Бу күннэргэ “Барҕарыы” култуура дьиэтигэр 2023 сылы үөрүүлээхтик аһыы буолла.
Дойду үрдүнэн 2023 сылы В.В. Путин “Учуутал уонна уһуйааччы” сылынан биллэрбитэ. Билигин биһиги нэһилиэкпитигэр П.И. Шадрин аатынан Өктөм орто оскуолата, Өктөмнөөҕү научнай үөрэх киинэ, Саха сирин билимин аччыгый кыһата, агротехнологическай университет Өктөмнөөҕү салаата таһаарыылаахтык үлэлииллэр. Өктөммүт историята киэҥ, онон “бастакы” диэн тыл нэһилиэкпитигэр элбэх. Ол курдук, улууспутугар бастакы билии кыһата аһыллыбыта, бастакы учуутал Өктөмтөн тахсыбыта.
Бу үөрүүлээх тэрээһиҥҥэ өр кэмҥэ уһулуччулаахтык үлэлээбит учууталларбыт, уһуйааннарбыт күндү ыалдьыт буолан ыҥырылыннылар. ОЛ курдук, П.И. Шадрин аатынан Өктөм орто оскуолатын бэтэрээн учууталлара Платонова Римма Романовна, Ноева Мария Гаврильевна, Соломонова Екатерина Федосьевна, Заморщикова Ирина Павловна, Тимофеева Елизавета Тимофеевна, Андреев Сергей Николаевич. Өктөмнөөҕү научнай үөрэх киинин уһулуччулаах учууталлара Ноговицына Валентина Петровна, Иванова Любовь Спиридиновна, Томская Клара Николаевна, Еремеева Ольга Матвеевна. Билигин даҕаны үтүө сүбэһит, нэһилиэк общественнай сэбиэтин чилиэнэ Иванова Зинаида Васильевна.
Хаҥалас улууһугар “Тыа хаһаайыстыбатын” сылыгар сөп түбэһиннэрэн эдэр ыччаты иитиигэ, уһуйууга килбиэннээхтик үлэлээбит учууталларга уонна уһуйааччыларга Эҕэрдэ Эркинэ ананна. Манна киирдилэр Өктөмнөөҕү СПТУ-17, АТЛ-17, онтон тыа хаһаайыстыбатын академиятын Өктөмнөөҕү салаатыгар уһуннук үлэлээбит дьоммут: Эльвира Павловна Шепелева, Николай Михайлович Острельдин, Татьяна Семеновна Степанова, Ольга Павловна Кириллина, Татьяна Федосьевна Алексеенко, Михаил Афанасьевич Засимов, Геннадий Иванович Борисов, Варвара Никитична уонна Иван Ильич Христофоровтар. Биһиги инникии кэскиллэрбит, оҕолорбут, үөрэхтэригэр төһүү күүс буолуо, ону таһынан учууталларга уонна уһуйааччыларга, кинилэр үлэлэрин үрдүктүк тутуохтара диэн эрэлбит улахан.
Сахабыт сирин Ил Дархана А.С.Николаев быйылгы сылы “Үлэ” сылынан биллэрбитэ уонна эппитэ: «Убаастабыллаах бар дьонум, кэлэр 2023 сылы Үлэ сылынан биллэрэбин. Үлэ сылыгар Сахабыт Сирэ, Арассыыйабыт сайдарын туһугар, бары биир санаанан салайтаран түмсүөҕүҥ, сомоҕолоһуоҥ» . Онно биһиги бары таһаарыылаахтык үлэлииргэ бэлэммит.

Суруйда Надежда Максимова, Өктөм бибилэтиэкэтин бибилэтиэкэрэ.