169 Общее количество просмотров,  2 Просмотров сегодня

Сэтинньи 25 күнүгэр Өктөм нэһилиэгин айар куттаах, кинигэни, хоһоону сэҥээрээччилэргэ дьоро күн: «Ийэлэр сирдээҕи аанньаллар” кинигэ сүрэхтэниитэ- буолла.
Кинигэни Саха Өрөспүүбүлүкэтигэр Ийэ сыла биллэриллибитигэр анаан өрөспүүбүлүкэ хоһоон айааччыларын холбоһуга уонна Хаҥалас улууһун Өктөм нэһилиэгин Анна Семеновна Данилова аатынан «Барҕарыы» култуура киинэ «Дани-Алмас» кинигэ бэчээттиир кыһатыгар 80 экземпляр ахсааннаах бэчээттэтэн таһаартардылар. Кинигэ 151 страницалаах. Кинигэҕэ уопсайа 73 ааптар айымньыта киирбит. Хас биирдии хоһоон ийэҕэ уҕараабат тапталы, ааспат ахтылҕан иэйиитин кэрэьэлиир. Манна анаммыт истиҥ тыллар биир тыынынан ааҕыллаллар. Кинигэ5э хас биирдии ааптар ийэтин толору аата баар уонна дьиэ кэргэн истиҥ сыһыанын көрдөрөр хаартыскаларынан таҥыллыбыт. Айар куттаах хоһоонньуттар тапталлаах ийэлэрин үйэ саас тухары үйэтитэн, кэнэҕэски ыччакка күндү бэлэх оҥордулар.
Бу кинигэни хомуйан оҥордо Өктөмнөөҕү «Барҕарыы” култуура киинин, норуот тыйаатырын режиссера Аржакова Зоя Егоровна.
Кинигэ тутулун, ис хоһоонун, тылын — өһүн туьунан Өктөмнөөҕү библиотека библиотекара Надежда Егоровна Максимова тиийимтиэ гына быһаарар кэпсээнэ көрөөччүлэр болҕомтолорун тарта.
Бу кэнниттэн кинигэ сурэхтэниитигэр кэлбит ыалдьыттар: СӨ суруйааччыларын сойууһун чилиэнэ, Өктөмнөөҕү «Үнүгэс» литературнай түмсүү салайааччыта Николай Степанович Егоров – Түөлбээкэп, Уваров Александр Михайлович – Сата Уола, Евсеева Каджана Николаевна – Чэлгийэ — кинигэ туһунан бэйэлэрин көрүүлэрин, баҕа санааларын эттилэр.
Ыалдьыттар уонна көрөөччүлэр «Абылаҥ алыптаах аартыгар» кинигэ быыстапкатын сэргээтилэр. Кинигэ быыстапкатыгар олохтоох автордар, Өктөм нэһилиэгин историятын, чулуу дьоннорун туһунан сырдататар араас сылларга тахсыбыт кинигэлэр туруорулуннулар.
Бу үөрүүлээх күнү музыкальнай эҕэрдэлэр, эҕэрдэ үҥкүүтэ уонна Андриан Белалюбскай ырыата киэргэтэн биэрдэ.
Бүтэһик түһүмэххэ кинигэни хомуйан бэчээккэ бэлэмнээбит Зоя Егоровна Аржакова кинигэ матырыйаалын хомуйааһыҥҥа хайдах улэлээбиттэрин ахтан — санаан ааста уонна Өктөмнөөҕү модельнай библиотекаҕа кинигэтин бэлэх уунна.
«Ийэлэр сирдээҕи аанньаллар” кинигэ сүрэхтэниитэ ити курдук, кинигэ тула, истиҥ-иһирэх кэпсэтии сиэринэн ааста.
Тэрээһин кэмигэр алаадьынан, итии чэйинэн кэлбит дьону күндүлээтилэр.

Өктөмнөөҕү модельнай библиотека сүрүн библиотекаря Матрена Егоровна Павлова

Поделиться: