379 Общее количество просмотров,  2 Просмотров сегодня

«Сахам сирэ-эйиэхэ аныыбын» диэн Хаҥалас улууска быйыл нэһилиэктэринэн ыытыллыбыт фестиваль театральнай көрүү-күрэһинэн түмүктэннэ.

Бу күннэргэ Хоточчуга СР уонна РФ культуратын үтүөлээх үлэһитэ, ССРС Суруйааччыларын Сойууһун чилиэнэ, Томпо улууһуттан төрүттээх, саха дьахталларыттан биир бастакынан роман суруйбут Анастасия Саввична Сыромятникова «Ыраах алааска» сэһэнинэн инсценировка туруорулунна.

Сэһэҥҥэ Саха сиригэр колхуостааһын кэмэ ойууланар, бастакы комсомоллар саҥа олох иһин туруулаһан үлэлээбиттэрэ, саха дьоно баттыгастаах олохтон сайдыы суолугар үктэниилэрэ кэпсэнэр. Олохтоох библиотекарь Лира Яндреева 5 көстүүлээх, 17 киһи кыттыылаах инсценировка сценарийын суруйда уонна туруорда.

Оруолларга эдэр ыччат, оскуола үөрэнээччилэрэ, араас эйгэҕэ үлэлии сылдьар дьон, бочуоттаах сынньалаҥҥа олорор дьиэ хаһаайкалара оонньоотулар. Төһө да тымныы, чысхаан тыаллаах күннэр турдаллар, күн ахсын кулууп дьиэттэн ыраахтан да олордоллор, репетицияҕа хата киэһэ ахсын кэлэннэр, былыргы олох көстүүтүн көрөөччүлэргэ итэҕэтиилээхтик оонньоон ситистэхпит.

Кыттааччылар бары да ис дууһаларыттан бэлэмнэнэн, нэһилиэкпит туһа диэн санааларын ууран туран кытыннылар. Патриотическай санаалара Хоточчу олохтоохторугар, уопсайынан да, бу фестиваль араас көрүҥэр көхтөөх кыттыыны ылбыттара көстөр.

Былыргы олоҕу сыанаҕа итэҕэтиилээхтик оонньоноругар бастатан туран, ол кэминээҕи мал-сал, таҥас-сап тупсарар. Улахан халаан уутун кэннэ манна дьэ ону булар уустуктардаах. Ол да буоллар, биирдиилээн ыал өбүгэлэрин малын харайан ампаардарыгар уура сыталлара сүрдээҕин туһалаата. Ветеринар идэлээх Татьяна Яндреева эбэлээх-эһэтин дьиэтиттэн былыргы сундук, талкы, түүлээх таҥас-сап арааһын сыанаҕа көтөх муҥунан сүгэн киллэрэн былыргы олоҕу көрдөрөргө сүрдээҕин көмөлөстө. Аны былыргы култайбыт чаанньык, молуоһунньук, култаҕар тимир иһит букатын туспа көстүүнү биэрдэ. Учуутал идэлээх А.Е. Винокурова өбүгэлэрин иһиттэрин бэрт кичэллээхтик харайа сылдьара көһүннэ, нэһилиэкпит араас тэрээһиннэригэр өрүү туһанабыт. Н.В. Егорова эһэтин сарыы этэрбэһин биэрэн, эбэтин маллаах иһитэ сыана атрибута буолан, көстүүнү тупсарда. Оннооҕор Н.П. Ефимов дьоҕус көрүҥнээх, тупсаҕай бэйэ оҥоһуута ат сыарҕата тиийэ тиэллэн кэлбитэ. Аны сыанабыт көстүүтүн ситэри ситэрэргэ талахтан, мастан оҥоһуллубут олоппостор наада буолбуттарыгар Богдановтар, Матвеевтар, Ефимовтар, Егоровтар ыаллартан хомуллан кэлэн турда.

Боростуой кумааҕы хортуонунан оҥоһуллубут көмүлүөк оһох тупсарыллан, кырааскаланан, букатын да дьиҥнээх оһохтон туох да итэҕэһэ суох гына көһүннэ. Кулууппут кыргыттара Евдокия Заболоцкая, Анастасия Ефимова уран тарбахтарынан тупсаҕай көстүүлээх гына оҥорон кэбистилэр.

Онтон сыананы саамай киэргэппит, былыргы балаҕан ис көстүүтэ уруһуйдаах, балай эмэ сыаналаах баннер тупсарда. Маны биир дойдулаахпыт, Дьокуускайга дьоҕус тэрилтэлээх уолбут Владислав Яндреев үбүлээн, махталбыт муҥура суох.

Кыттыыны ылбыт эдэр ыччат дьоммут Василий Иванов, Василий Матвеев, Петр Пестерев, Андрей Черноградскай, Майя Уваровская, Уйгулаана Васильева, Марфа Ефимова өрүү маннык инники күөҥҥэ сылдьалларыгар баҕарабыт. Чуолаан оскуола оҕолорун бэлиэтиир тоҕоостоох. Ол курдук, 5 кылаас үөрэнээччитэ Анжелика Старостина бэрт итэҕэтиилээхтик былыргы оҕо оруолун оонньоото, туттара-хаптара да күннээҕи олохтон атыннык буоларын өйдөөн, бэрткэ толордо. Кыра кылаас үөрэнээччитэ Дьулусхан Ефимов төһө да ыраах олордор, тымныыттан чаҕыйбакка, кэлэн кыттыбыта  бэйэтин эппиэтинэстээх буоларын көрдөрдө.

Кыттааччылар үгүстэрэ сыанаҕа саҥа тахсан, театральнай көстүүгэ саҥа сүрэхтэниилэрэ да буоллар, оруолларыгар олус бэрткэ оонньоотулар диэн бэлиэтии көрдүм. «Олорор олохпутун бэйэбит киэргэппэтэхпитинэ — ким киэргэтиэй?» -диэн бэйэлэрэ да дуоһуйуу ылан, көрөөччүлэр сүргэлэрэ көтөҕүллэн тарҕастылар

Бука бары маннык өрүү түмсүүлээх буолан, нэһилиэкпит олоҕун тупсара туруоҕун!

Сурукка тистэ Хоточчу олохтоох библиотека үлэһитэ Лира Яндреева.

 

Поделиться: