1,836 Общее количество просмотров,  1 Просмотров сегодня

Биһиги нэһилиэккэ «Төрөөбүт тыл уонна сурук-бичик күнүгэр» аналлаах декада тэрээһинэ түмүктэннэ.
Бастакы күн, «Илгэ» үҥкүү ансаамбыла «Хомус үҥкүүтүнэн» тэрээһини арыйда.
Петр Пестерев » Киһиэхэ төрөөбүт дойдута» ырыа ыллаан көрөөччүлэри сэргэхситтэ.
Түөлбэлэр ыккардыларыгар остуол оонньуутугар күрэх буолла. Кулууп саалата хабылык, хаамыска таһырҕас тыаһынан, кыттааччылар, көрөөччүлэр көхтөөх күйгүөрдэринэн туолла. Сылын ахсын үгэскэ кубулуйбут «Сахалыы дьыктаан» суруйуутугар 10 киһи бэйэлэрин холонон көрдө.
Тэрээһиҥҥэ кэлбит дьоҥҥо анаан «Сахалыы тылдьыттар» кинигэ быыстапката турда.
Дьоро күн оһуохайынан түмүктэннэ.
Кэлбит дьон сэргэхсийэн, дуоһуйа сынньанан, саҥаны, сонуну билэн-көрөн, сэргээн, астынан тарҕастылар.
Иккис күн эмиэ бэрт сэргэхтик ааста.
Бастатан туран, «Сахалыы дьыктаан» кыттыылаахтарыгар туоһу сурук туттарылынна уонна чаҕылхайдык суруйбуттар бэлиэтэннилэр. Биир да сыыһата суох суруйбут алын кылаас учуутала Богданова Л.Н. «Бастыҥтан бастыҥ суруксут», Готовцева Д.И уонна Михайлова А.Е. «Бастыҥ суруксут», Мохначевская З.И, Ефимова А.М.,Заболоцкая Е.А. «Үчүгэй суруксут» аатын ыллылар.
Өйү сайыннарар, толкуйдатар остуол оонньууларын оонньуу кэлбит дьон астынан, дуоһуйа сынньанан, саҥаны билэн, сорох түгэҥҥэ дэлби күлсэн, бэрт сэргэх тэрээһин буолла.
Билигин Ҥ дорҕоону сурукка үксүгэр суруйбат буоллулар, телефон сахалыы сириибэ суоҕун содулугар бу дорҕоон сүтэр чинчилээх, диэн тыл үөрэхтээхтэрэ элбэхтэ этэллэр. Онон, биир бастакы оонньуубут «Ҥ» дорҕоонноох тыллары мүнүүтэ иһигэр суруйуу диэн буолла. Кыттааччылар бэрт элбэх тылы суруйан үөртүлэр.
«Т.У.О.С»- толкуйдатар, умсугутар, оонньотор, сынньатар, диэн Олег Колесов-Талбан айбыт оонньуутун сэргээтилэр, элбэх саҥаны биллилэр. Кыайыылааҕынан, элбэх туоһу таайан ылбыт Винокурова А.Е. кинигэ бириис хаһаайына буолла. Бэриллибит бириэмэ иһигэр уһун тылтан элбэх тылы суруйууга, ону таһынан «Үс тыл» диэн бэйэм толкуйдаабыт оонньуубун бүгүҥҥү тэрээһин кыттыылаахтара биир бастакынан холонон көрдүлэр, сэҥээрдилэр.
Бүтэһигэр, мэйиини сынньата таарыйа, аныгы «Jenga» оонньууннан түмүктээтибит.
«Төрөөбүт тыл уонна сурук-бичик» декадатын түмүктүүр күҥҥэ,
биир дойдулаахпыт Илья Афанасьевич Васильев-Ылдьаа Хоточчу хоһооннорун дорҕоонноохтук ааҕыы күрэх бэрт сэргэхтик ааста.
«Хоһоон иэйиитигэр уйдаран» лирическэй биэчэри иилээн- саҕалаан ыытта сынньалаҥ киинин тутаах үлэһитэ Анастасия Ефимова.
Любовь Варламова автор хоһоонноругар мелодия айан, бэл диэтэр, радиоҕа тиийэ ылланар ырыаларын бу киэһэ ыллаан көрөөччүлэр сэҥээриилэрин ылла. Петр Пестерев ырыатын кэлбит дьон сэргии иһиттилэр, «уолбут тупсан иһэр», дэстилэр көрөөччүлэр.
Бастыҥ хоһоон ааҕааччы буолла саха тылын учуутала Васильева М.В, хоһоону иэйиилээхтик ааҕааччы алын кылаас учуутала Винокурова А.Е уонна автортан анал бирииһи ылла. Кэскиллээх хоһоон ааҕааччы аатын ылла Макарова Л.Н, детсад сэбиэдиссэйэ.
Автор уонна биһиги, библиотекарь идэлэээхтэр, дьүүллүүр сүбэҕэ олордубут.
Тэрээһиннэргэ кыттыбыт дьон бэрткэ сэргээтилэр, бэйэлэрэ да сэргэхсийдилэр.
Кэрэни кэрэхсээҥ, үтүөнү үксэтиҥ, сырдыгынан сыдьаайыҥ!