1,618 Общее количество просмотров,  2 Просмотров сегодня

Өрөспүүбүлүкэбит килбэйэр киинигэр Дьокуускай куорат туонатыгар бэс ыйын 10 күнүгэр Хомсомуол болуоссатыгар С.А.Новгородов аатынан «Айар» национальнай кинигэ кыһата «Айар үрүҥ түүнэ» диэн бэрт сэргэх, сонун тэрээһин тэрийэн дьон-сэргэ болҕомтотун тарта. Бу тэрээһин биир сүрүнэ – буруолуу сылдьар саҥа кинигэлэр сүрэхтэниилэрэ буолла.

Биһиги биир дойдулаахпыт, прозаик, публицист, Арассыыйа Суруйааччыларын, Суруналыыстарын сойууһун чилиэнэ, хас да кинигэ ааптара Анна Егоровна Варламова (Матвеева) — Айысхаана  оҕолорго аналлаах «Кэмсилгэн» кинигэтин сүрэхтэниитэ буолла.

Сүүрэн-көтөн, кэпсэтэн, тэрээһини торумнаан, тэрийээччилэртэн биирдэстэрэ — «Айар» кыһа Үөрэх уонна оҕо кинигэтин киинин эрэдээктэрэ, кэскиллээх эдэр салайааччы Саргылана Федоровна Константинова ыҥырыытынан, болдьоммут биир чаас иһигэр биир дойдулаахтара Хаҥалас улууһун Хоточчутуттан эбэни уҥуордаан, айаннаан тиийэн тэрээһиҥҥэ кытынныбыт. Анна Егоровна айар үлэтин сырдата, эҕэрдэ тылларын этэ,  ырыа-үҥкүү кэһиилээх, бэлэх-туһах тутуурдаах тиийэммит суруйааччы махтал, алгыс тылларын ыламмыт санаалыын көнньүөрдүбүт дэһэбит. Билигин Анна Егоровна дьоһуннаах сынньалаҥҥа олордор да, айар үлэтин бырахпат. Быйыл, кини ааҕааччыларыгар 2 кинигэ бэлэх уунна. «Уостубат уйаҕас ахтылҕан» ахтыы-сэһэн уонна бу оҕолорго аналлаах кинигэтэ.

Аан маҥнайгынан сыанаҕа тыл билимин дуоктара, М.К. Аммосов аатынан Хотугулуу-Илиҥҥи Федеральнай университет бэрэпиэссэрэ, СӨ Суруйааччыларын сойууһун чилиэнэ, РФ үөрэхтээһинин Бочуоттаах үлэһитэ, П.А. Ойуунускай аатынан СӨ Судаарыстыбаннай бириэмийэтин лауреата, саха тылын өрө тутар биир саамай ытыктанар, киэн туттар киһибит Варвара Борисовна Окорокова тыл этиитинэн саҕаланна.

Сахалыы тыллаах, элбэх сэҥээрээччилээх «Тэтим-Саха» араадьыйатын сэргэх ыытааччыта Индира Софронова Айысхаана саҥа тахсыбыт кинигэтиттэн «Кэмсилгэн» кэпсээнин уус-ураннык ааҕан иһитиннэрдэ. Кинигэ сүрэхтэниитин сэргэхситтэ.

Үүнэр көлүөнэ тыйаатыр эдэр артыыһа Сахайаана Вырдылина «Маасыкка» кэпсээнтэн «Куурусса уйата-оскуола» чааһыттан, киһи эрэ истэ олоруох курдук, айымньыны бэрткэ ааҕан дьон болҕомтотун тарта.

Бу тэрээһиҥҥэ  «Айар» кинигэ кыһатын сүрүннүүр дириэктэрин солбуйааччыта, СӨ култууратын үтүөлээх үлэһитэ, СӨ бэчээтин туйгуна Валерий Николаевич Луковцев эҕэрдэ тылын эттэ уонна Август Васильевич Егоров салайааччылаах «Айар» кинигэ кыһатын аатыттан кыттыбыт дьоҥҥо махтал сурук, кинигэ ыларга харчылаах сертификат туттарда.

Хаҥалас улууһун кииннэммит библиотека ситимин дириэктэрэ Ираида Иннокентьева Адамова, «1-Дьөппөн нэһилиэгин» МТ дьаһалтата, биир дойдулаахтарын аатыттан Варламова А.Н., Черноградская Е.В., Васильева М.В. уонна Айысхаана аймах-билэ дьоно үөрэн-көтөн, махтанан туран тыл эттилэр.

Хоточчу култуура киинин иһинэн үлэлиир «Алгыс» ансаамбыл кыттыылаахтара (сал. Евдокия Заболоцкая) биир дойдулаахтарбыт Ылдьаа-Хоточчу суруйбут хоһоонугар, Любовь Варламова матыыбыгар «Дойдум сарсыардата» ырыаны ыллаан доргуттулар. «Илгэ» үҥкүү бөлөҕө (сал. Анастасия Ефимова)  Хомус үҥкүүтүн толорон көрөөччүлэр сэҥээриилэрин ылыан ыллылар.

Кэрэ куоластаах кэскиллээх кэнчээри ыччаппыт, оскуола үөрэнээччитэ Наташа Заболоцкая (сал. Дарья Готовцева) «Бастыҥа» ырыаны ыллаан доллоһутан кэлбит дьон сэргээн, сэҥээрэн иһиттилэр.

Кинигэ сүрэхтэниитин олохтоох библиотека үлэһитэ Л.М. Яндреева ыытта. Култуура киинин үлэһиттэрэ Анастасия Ефимова, Евдокия Заболоцкая «Дьол» ырыанан сэргэх тэрээһини түмүктээтилэр.

С. А. Новгородов аатын сүгэр «Айар» кинигэ кыһатын үлэһиттэригэр баҕарабыт өссө да үүнэ, сайда, чэчирии тураргытыгар!

Сурукка тистэ Хоточчу олохтоох библиотекатын үлэһитэ Лира Яндреева