548 Общее количество просмотров,  3 Просмотров сегодня

Кулун тутар 21 күнэ- Аан дойдутааҕы Поэзия күнэ. 1999 сыллаахха, поэзия көмөтүнэн араас омук тылынан тиэрдиини өйүүр соруктаах уонна сүтэн эрэр тыллары чөлүгэр түһэрэр туһуттан, ЮНЕСКО кулун тутар 21 күнүн Аан дойдутааҕы Поэзия күнүнэн биллэрбитэ.
Бу күҥҥэ анаан Булгунньахтаах библиотекатын иһинэн тэриллибит “Айар кытыл” литературнай түмсүү кыттыылаахтара, Сергей Макаров бастакы кинигэтэ “Айар кут алгыстаах кырдала” уонна Александр Уваров- Сата Уола саҥа тахсыбыт кинигэтэ “Кырдьар сааһым аргыстара” диэн хоһоон хомуурунньуктарын сүрэхтиир истиҥ көрсүһүү буолла. Тэрээһин саҕаланыытылар ааптардар бэйэлэрин туһунан кэлбит дьоҥҥо сырдаттылар, махтал тылларын көмөлөспүт дьонноругар анаатылар. Эҕэрдэ тыллары эттилэр: 1 Малдьаҕар нэһилиэгин баһылыга Васильева А.И, “Дьиэрэй ырыа” култуура киинин директора Ефремова Т.Г. Ону таһынан Александр Уваров- Сата Уола уонна Сергей Макаров хоһооннорун “Айар кытыл” түмсүү ааҕан иһитиннэрдэ. Тэрээһиммитин киэргэттилэр ыҥырыылаах ыалдьыттарбыт, Дьокуускай куораттан “Уран тыл оһуора” литературнай түмсүү, салайааччы Раиса Николаевна Тимофеева- Михайлова. Раиса Николаевна бэйэтин түмсүүтүн сэргэхтик билсиһиннэрдэ, суруйбут хоһооннорун ааҕан иһитиннэрдилэр уонна музыкальнай эҕэрдэлэрин тириэртилэр. Түмүгэр кэлбит дьоҥҥо кинигэ бэлэх ууннулар. Тэрээһин түмүгэр Сергей Макаров бэйэтэ суруйбут ырыатын бэлэх уунна. Бэрт сэргэх көрсүһүү буолла. Салҕыы ыалдьыттарбытын кытары билсиһии остуолун тэрийэн, чэйдии олорон истиҥ кэпсэтии буолла. Икки литературнай түмсүү билсиһэн, астынан тарҕастыбыт.
Айар эйгэлээх дьоммут хоһоонноро дьон- сэргэ ааҕыытыгар тахсыбыта улахан ситиһии буолар. Кинигэ ааптардарыгар, айар үлэ алыптаах хонуутугар бигэтик хардыылаан, кэрэттэн кэрэни, уратыны хоһуйар уран тыл маастардара, сахалыы дьиҥ тыыннаах хоһоонньут буола үүнэн тахсаргытыгар, ааҕааччы биһирэбилин ылан үрдүк ситиһиилэри, иэйиини, дьолу эһиэхэ баҕарабыт!
Тэрээһиҥҥэ көмөлөспүт дьоммутугар махталбытын тириэрдэбит.
Олохтоох библиотека салайааччыта Анисия Дьяконова.