Муус  устар 22 күнүгэр Бүтүн Россиятааҕы түүҥҥү библиотека акцияҕа кыттыһан Хаҥалас улуустааҕы библиотеката ааҕааччыларыгар бэйэтин тэрээһиннэрин ыытта. Бу күн, сарсыарда 11 чаастан историческай наука кандитата, востоковед Афанасий Алексеевич Николаев үс кинигэтин:

“Саха кэпсээбэт кистэлэҥэ”, ”Уроки Алексея Кулаковского”, “ Сталин маршал Победы ” сүрэхтэниилэрэ буолла.

Тэрээһиҥҥэ “Саха кэпсээбэт кистэлэҥэ” кинигэни  сахалыы тыыннаан тылбаастабыт “Хоту дойду” аһымал фондатын вице- президенэ, Холбоһуктаах нация тэриллэтин аҕыйах ахсааннаах норуоттар форумнарын хас да төгүл кыттыылааҕа Попов Степан Федотович – Айыы Сиэн уонна АА. Николаев кэргэнэ культуролог Саргылаана Борисовна Николаевна – Тупсууна кыттыыны ыллылар.

 

Автор  “Саха кэпсээбэт кистэлэҥэ” кинигэҕэ саха норуотун түҥ былыргы олоҕүн ырытааһын ону тэҥэ киһи аймах Аан дойдуга Саха сириттэн тарҕанан барбытын итэҕэтиилээхтик суруйбут. А. Николаев кинигэлэригэр атын автордар суруйбут үлэлэрин үөрэтэн тэҥнээн көрөн ырытан суруйбута сүрдээх кэрэхсэбиллээх. Саха норуота түҥ былыргы буоларын Турция тахсыбыт картаты үөрэтэн дьон билиитигэр таһаарбыта дьон болҕомтотун тарда. Саха ынаҕа уонна сылгыта төрүт сирдэрэ саха сирэ буоларын итэҕитиилээхтик дакаастыыр. Арийдар ханна уонна хаһан үөскээбиттэрэй, саакилар, курыкааннар, хуннар хантан төрүттээхтэрий уонна да атын ыйытыылары бу кинигэттэн булуохха сөп?

Аҕа дойду Улуу сэриитин кэнниттэн аҕыйах сыл иһигэр Сталин дойдуну хайдах чөлүгэр түһэрбитин туһунан архивнай уонна биографическай даннайдарга олоҕуран “Сталин Маршал Победы”  диэн кинигэтигэр Афанасий Николаев дьиҥ чахчытык суруйбут.

Билигин Аан дойду балаһыанньата тыҥаан турар кэмин биһиги бөлүһүөкпүт Алексей Кулаковскай   “Саха интеллигенциятыгар ” суруйбут суругун уонна “Ойуун түүлүгэр”, “Уроки Алексея Кулаковского” диэн кинигэтигэр ырытан, бэйэтин көрүүтүн суруйбут.

Көрсүһүү кэлбит дьон интириэһин сүрдээҕин тарта. С.Б. Николаева – Тупсууна бэйэтэ сылдьыбыт сырыыларыттан Турцияҕа, Бурятияҕа интириэһинэй түбэлтэлэриттэн кэпсээтэ, кылыһахтаах куолаһынан тойук туойан алҕаата.

Биһиэхэ, библиотекаҕа ыалдьыттыыр дьоммут Хаҥалас улууһун ытыктыылларын биллэрэллэр, тойон ууһа диэн билинэллэр. Олохпут улларыйаары турар онон биһиги, сахалар бэйэбит төрдүбүтүн- ууспутун билэр кэммит кэллэ.