890 Общее количество просмотров,  3 Просмотров сегодня

Кулун тутар 2 күнүгэр улуустааҕы библиотека «Иһирэх түмсүү» литературнай – музыкальнай гостинайыгар биир дойдулаахпыт, Россия Суруйааччыларын уонна Суруналыыстарын сойууһун чилиэнэ, СР культуратын үтүөлээх үлэһитэ, СР үөрэҕириитин туйгуна, СР Бэчээтин туйгуна, Евразия суруйааччыларын лигатын «Литературный олимп» диэн Норуоттар икки ардыларынааҕы мэтээл, Саха сирин суруналыыстарын сойууһун «Суруналыыстыкаҕа кылаатын иһин» анал бэлиэ хаһаайката, «Чолбон» сурунаал эппиэттиир сэкирэтээрэ Анна Егоровна Варламова – Айысхаана «Айар үлэ – дьылҕам бэлэҕэ» диэн үбүлүөйдээх сааһыгар анаан истиҥ көрсүһүү буолла.
 

           Көрсүһүүнү «Иһирэх түмсүү» литературнай – музыкальнай гостинай салайааччыта Валентина Николаевна Колесова салайан ыытта. Биэчэргэ улуус киин библиотекатын информация-библиография салаатын библиографтара А.М. Наумова уонна З.С. Келина “Варламова Анна Егоровна-Айысхаана” диэн биобиблиографическай ыйынньык 2-с  таһаарыытын суруйааччы үбүлүөйүгэр анаан оҥорон таһааран бэлэх ууннулар. Бу ыйынньык суруйааччы үгүс өрүттээх үлэтин уонна олоҕун туһунан литератураны кытта билсиһиннэрэр. Ыйынньык презентационнай матырыйаалынан ырытыллан көрдөрүлүннэ. Биэчэргэ Анна Егоровна – Айысхаананы  биир  идэлээхтэрэ — «Чолбон» сурунаал сүрүн редактора Данил Макеев, Саха сирин суруйааччыларын Сойууһун салалтатын бэрэссэдээтэлин солбуйааччы Гаврил Андросов, Хаҥалас улууһун кииннэммит библиотечнай ситим директора Фекла Романовна Варламова, СӨ култууратын үтүөлээх үлэһитэ, СӨ П.А. Ойуунускай аатынан Государственнай бириэмийэтин лауреата, Хаҥалас улууһун бочуоттаах олохтооҕо, биллэр суруйааччыбыт Павел Николаевич Харитонов – Ойуку.  Көрсүһүүгэ “Чолбон” сурунаал сүрүн редактора Данил Макеев редакциятын аатыттан биобиблиографическай ыйынньыктар сыралаах үлэттэн тахсалларын уонна суруйааччыга олус суолталааахтарын бэлиэтээн туран  библиотечнай ситим директорыгар Ф.Р. Варламоваҕа Махтал суругун туттарда.
А. Е. Варламова -Айысхаананы биир дойдулаахтара — I Дьөппөн нэһилиэгиттэн оҕо сааһын доҕоро Маргарита Кириллина, Ермолай Скрябин, «Өлүөнэ долгуннара» литературнай түмсүү айар куттаах дьоно эҕэрдэлээн бэйэлэрин тылларын тиэртилэр. Көрсүһүүнү киэргэттилэр ылбаҕай ырыаларынан  Лидия Харитонова уонна Галина Иванова – Айтыына Уран. Кэлбит ыалдьыттар көрсүһүүттэн астынан-дуоһуйан тарҕастылар.
 
Поделиться: