1,527 Общее количество просмотров,  6 Просмотров сегодня

Бэҕэһээ Саха сирин дьахталларын XV съезтэрин пленарнай мунньаҕар өрөспүүбүлүкэ биллэр-көстөр дьахталларын, элбэх оҕолоох ийэлэрин СӨ Бырабыыталыстыбатын бэрэссэдээтэлэ Андрей Тарасенко эҕэрдэлээтэ уонна наҕараадалары туттарда. Хаҥалас улууһуттан икки ийэ – Покровскай куорат олохтооҕо Екатерина Рожина уонна Уулаах Аантан Валентина Припузова «Ийэ Албан аата» III истиэпэннээх бэлиэнэн наҕараадаланнылар.

Оттон улууспут нэһилиэктэриттэн общественнай түмсүүлэр кыттыылаахтара, актыбыыс кэрэ аҥардар кэлэннэр оройуоннааҕы Кииннэммит бибилэтиэкэҕэ бу түмүктүүр пленарнай мунньахха онлайн холбонон кытыннылар.

Мустубут дьахталлары улуус баһылыгын аатыттан Оройуон сэбиэтин бэрэссэдээтэлэ Анатолий АНТОНОВ эҕэрдэлээтэ. Кини биһиги улууспутугар дьахталлар хамсааһыннара бары ылсыбыт үлэҕэ ситиһиилээхтэрин, араас тэрээһиҥҥэ куруук көхтөөхтүк кытталларын, дьахталлар урут уонна билигин даҕаны олоххо дьулуурдарынан, тулуурдарынан уонна хорсуннарынан аатыраллар диэн бэлиэтээн туран, кэккэ наҕараадалары туттартаата. Ол курдук, СӨ Ыччат дьыалаларыгар уонна социальнай коммуникацияларыгар министиэристибэ Бочуотунай грамотатынан Светлана Ксенофонтова (Өктөм с.), Галина Семенова (Покровскай к.), Махтал суругунан Елизавета Христофорова (Тумул с.), Екатерина Шадрина (Өктөм с.), Любовь Платонова (Булгунньахтаах с.), Августа Гаврильева (Ой с.) наҕараадаланнылар. Оройуон Сэбиэтин аатыттан Бочуотунай грамотаны Анна Федорова (Булгунньахтаах с.), Уруйдана Спиридонова (Покровскай к.), Ольга Баишева, Клавдия Кривошапкина (Өктөм с.) туттулар.

Тэрээһин түмүгэр улуус дьаһалтатын социальнай политикаҕа салаатын кылаабынай испэсэлииһэ Пелагея Прокопьева быйыл өрөспүүбүлүкэҕэ биллэриллибит Ийэ сылынан улуус оҕолордоох дьиэ кэргэннэргэ, чуолаан ийэлэргэ, түмсүүлэргэ туох-ханнык үлэ, өйөбүл көрүҥэ тэриллэрин билиһиннэрдэ.

Ольга Гермогенова, ханаласгазета.рф