1,184 Общее количество просмотров,  3 Просмотров сегодня

Соторутааҕыта Хаҥаластааҕы инбэлииттэр уопсастыбаларын дьиэ кэргэҥҥэ аналлаах күрэхтэһиилэрэ буолан ааста. Куонкуруска Өктөмтөн, Уулаах Аантан, Нөмүгүттэн, Чараҥтан барыта 5 дьиэ кэргэн кыттыыны ылла.
«Саргы түһүлгэтэ” култуура киинин кафетыгар уопсастыба чилиэннэрэ, кыттааччыларга «ыалдьааччылар” мунньуһуннулар. Куонкуруһу иилээн- саҕалаан ыыттылар Скрябина Н.Ф. уонна Охлопкова А.Е. Күрэхтэһиибит «Үчүгэйиэн бу сиргэ-иллээх кэргэн буоларга” диэн ийэлэр күннэригэр ананна.
Ол курдук, Нөмүгүттэн – Надежда Михайловна , Владимир Мартович Татариновтар уонна Лия Валерьевна, Петр Егорович Жирковтар, Уулаах Аантан –Ольга Ефимовна, Дмитрий Иванович Захаровтар, Өктөмтөн –Тамара Афанасьевна, Иван Егорович Оконешниковтар, Чараҥтан – Маргарита Васильевна, Симон Мирович Канаевтар дьиэ кэргэттэрэ күрэхтэһиигэ кытыннылар.
 
Күрэхтэһии биэс түһүмэҕинэн барда: «Көмүлүөк сылааһа» (визитка, дьиэ кэргэни сырдатыы), «Олох эргиирэ салҕанар» (дьиэ кэргэн үтүө үгэстэрэ), «Саамай кыраһыабай, саамай тапталлаах» (аҕа баһылык ийэни сырдатыыта), «Сатабыллаах — саһыл саҕалаах» (талааны көрүү, авангард көстүүм, дьиэ кэргэн сөбүлүүр бүлүүдэтэ), «Талба таҥас» (мааны таҥас көрүүтэ). Дьүүллүүр сүбэ бэрэссэдээтэлэ Константинова Л.Д., чилиэннэр – Шишигина Г.А.,Марков Г.В., Тимофеева У.С., Куприянова Н.Д. сэттэ номинация биэрэн сыаналаатылар. Түмүк маннык буолла: Канаевтар дьиэ кэргэннэрэ“Сатабыллаах дьиэ кэргэн”уонна“Көрөөччү биһирэбилэ”номинациялар хаһаайыттара буоллулар, Захаровтар дьиэ кэргэннэрэ “Истиҥ сыһыаннаах дьиэ кэргэн”, Оконешниковтар “Сандалы астаах дьиэ кэргэн”, Татариновтар “Удьуор утумнаах дьиэ кэргэн ”уонна “Тарбаҕар талааннаах дьиэ кэргэн”ааттарын ыллылар. Дьэ, саамай бастыҥ дьиэ кэргэн  “Кэрэни кэрэхсиир дьиэ кэргэн ” аатын сүктүлэр Жирковтар-түөрт оҕолоох эдэр дьиэ кэргэн. Дьүүллүүр сүбэ уонна уопсастыба бэрэссэдээтэлэ Татьяна Гаврильевна Харлампьева күрэхтэһии кыттылаахтара кырдьык да бары талааннаах, иллээх, сатабыллаах буолан бэрткэ бэлэмнэнэн ситиһиилээхтик кыттыбыттарын ыйдылар, барыларыгар сыаналаах бириистэри, лиэнтэлэри туттартаатылар. Аныгыскы сырыыга өссө күүскэ бэлэмнэнэн, хомунан – симэнэн атын ыаллар кыттыахтара диэн эрэллэрин биллэрдилэр. Ордук чуолаан, Покровскай куорат, Мохсоҕоллоох, Бэстээх бөһүөлэктэриттэн, Булгунньахтааах нэһилиэгиттэн кыттааччы суоҕун бэлиэтээтилэр. Куонкурус кыттыылаахтарын, ыалдьыттары Андриан Егоров, Лена Осипова, Амгалена ырыанан эҕэрдэлээн, сүргэлэрин көтөхтүлэр.

Бастакы куонкурус ситиһиилээхтик барбытыгар Татьяна Гаврильевна уонна Лена Николаевна тэрийэр дьоҕурдара улахан оруоллаах.

Поделиться: