1,860 Общее количество просмотров,  1 Просмотров сегодня

Олунньу 13 күнүгэр Өктөм нэһилиэгэр Ийэ тыл уонна сурук бичик декадата үрдүк таһымнаахтык буолан ааста. Бу күнү Саха Республикатын бастакы Президенэ Михаил Ефимович Николаев 1996 сыллаахха саха алпаабытын төрүттээччи, бастакы учуонай, лингвист Семен Андреевич Новгородов төрөөбүт күнүгэр — Ийэ тыл күнүнэн биллэрбитэ.
Өктөм орто оскуолатын үрдүкү кылаас үөрэнээччилэрэ «Ийэ тыл — бараммат барҕа баай» литературнай киэһэҕэ көхтөөхтүк кытыннылар. Бу күн оҕолор «Саха тылын быhаарыылаах улахан тылдьыт» сүдү суолталааҕын туһунан, ис тутулун сиһилии билистилэр.
Бу үлэҕэ хара маҥнайгыттан үлэлээбит дьоннор тустарынан уонна биһиги биир дойдулаахпыт филологическай наука хандьыдаата, тылдьыт ааптара Владимир Иванович Лиханов үлэлэспитин сэҥээрэ, киэн тутта иһиттилэр.
Ону таһынан Саха тылын быһаарыылаах улахан тылдьыта Ил Дархан Айсен Николаев соругунан электроннай көрүҥҥэ көһөрүллүбүтүн, хаһан баҕарар, ханна баҕарар тылдьыты булан хайдах туһанары билистилэр.
Биһиги тылдьыппытын Саха сиригэр эрэ буолбакка Россияҕа, тюрк тыллаах омуктар үрдүктүк сыаналаабыттарын оҕолор видеонан Турция, Казахстан национальнай бибилэтиэкэлэриттэн ыыппыт эҕэрдэлэрин иһиттилэр.
Түмүккэ «Саха тылын төһө билэҕин?» тургутук викторина ыытылынна.
Тэрээһин филологическай наука дуоктара, бэрэпиэссэр, тылдьыт кылаабынай эрэдээктэрэ Петр Алексеевич Слепцов этиитинэн түмүктэннэ.
Декада чэрчитинэн Чапаевтааҕы лицей уонна Өктөм орто оскуолатын алын кылааһын оҕолоругар, кырачаан ааҕааччыларбытыгар «Николай Мординов – Амма Аччыгыйа – айар тыл маастара» литературнай ырытыыны ыыттыбыт. Оҕолор уһулуччулаах суруйааччы «Тоҕус төгүл тоҕо?» айымньытынан туруоруллубут видеоны көрөн, кинигэтин ааҕан ырытыыга көхтөөхтүк кыттан билиилэрин көрдөрдүлэр.
Ийэ тыл уонна сурук бичик күнүгэр Өктөм, Чапаев библиотекалара өрөспүүбүлүкэ үрдүнэн ыытыллыбыт «Сахалыы дьыктаан» суруйуутугар баҕалаах дьон түмсэн дьыктаан суруйуутугар кытыннылар.
Библиотека иһинэн тэриллибит «Кырадаһын оһуора» түмсүү салайааччыта Ольга Николаевна Дьячковская «Симэхтээх оһуорум иэйиитэ» айар киэһэтэ буолла. Ольга Николаевна кыбытыгынан тигиигэ маастар кылаас ыытта, үлэлэрин быыстапкатын билиһиннэрдэ. Библиотекалар «Симэхтээх оһуорум иэйиитэ» кинигэ быыстапкатын билиһиннэрдилэр.
Чапаев библиотеката «Ийэ тыл илгэтинэн» куйаар нөҥүө дьиэ кэргэр викторинатыгар олохтоохторо көхтөөхтүк кытыннылар.
Бастакы миэтэни Исаковтар дьиэ кэргэттэрэ, иккис миэстэ Дмитриевтар, үһүс миэстэ Степановтар дьиэ кэргэттэрэ ыллылар.
Өктөм библиотеката «Саха ынаҕа – өбүгэ баайа» куйаар нөҥүө ыытыллыбыт викторинаҕа бастакы миэстэни Константинова М.П., иккис миэстэ Мария Аянитова, үһүс миэстэ Соломонов И.С. буоллулар.
Саха өрөспүүбүлүкэтин үрдүнэн ыытыллар Ийэ тыл уонна суруй – бичик декадатын түмүктүүр «Ийэ тыл илгэлээх сүмэтэ» көрсүһүү киэһэтигэр «Үнүгэс түмсүү» бэйэтин үлэтин билиһиннэрдэ. Олохтоох айар куттаах тыл маастардарын хоһооннорун көрөөччүлэргэ библиотека үлэһиттэрэ ааҕан иһитиннэрдилэр. «Ийэ тыл илгэлээх сүмэтэ» олохтоох ааптардар кинигэлэрин быыстапкатын ыалдьыттар сэҥээрэ көрдүлэр. Үөрүүлээх киэһэбит оһуохайынан түмүктэннэ.

 

Поделиться: