1,730 Общее количество просмотров,  1 Просмотров сегодня

Комсомол күнүн көрсө уонна Саха сиригэр Комсомол төрүттэммитэ 100 сылыгар анаан » Советтар Знамялара» хаһыат саһарбыт страницатыттан бэлиэтээһини сырдатыам.
Уоттаах сэрии кэмигэр 1943 сыллаахха алтынньы ый 29 күнүгэр буойун- суруйааччы Исай Прокопьевич Никифоров бииргэ төрөөбүт быраатын туһунан суруллубут.
Иннокентий Прокопьевич Никифоров 1941 сыллаахтан бу хаһыакка литературнай сотруднигынан үлэлии сылдьыбыт эбит уонна 1942 сыллаахха сэриигэ ыҥырыллан баран, 1944 сыллаахха сэрии толоонугар охтубут.
Бу ыстатыйаҕа кини туһунан маннык суруллубут.
?

Ленин-Сталин комсомолун боевой кэккэтигэр иитиллибит Иннокентий Прокопьевич Никифоров 1942 с кулун тутар 3 күнүгэр Кыһыл Армия кэккэтигэр ыҥырыллыбыта.Кини фроҥҥа барар күнүгэр доҕотторугар эппитэ: -» Мин бүгүн советскай народум көҥүлүн, чиэһин уонна тутулуга суох буолуутун иһин немецкэй талабырдьыттары урусхаллыыр охсуһууга барабын. Өһөгөйдөөх өстөөҕү үлтүрүтүүгэ өлөртөн куттаммакка боевойдук сылдьан партия правительство сорудахтарын чиэстээхтик толоруохтаахпын. Мин түөспэр илдьэ сылдьар комсомолум бэлиэтэ эр хорсун санаалаах буоларга үөрэтэр» диэбитэ. Иннокентий Прокопьевич Кыһыл Армия кэккэтигэр ыҥырыллаат пулеметнай отделениеҕа байыаһынан сырыттаҕына отделения командирын солбуйааччынан анаабыттара. Кини онно туйгун дисциплинэтин уонна дьоҕурдарын көрдөрбүтүн иһин хаста да рота командирын махталын ылбыта уонна рота командирын солбуйааччынан өрө ытыарыллыбыта. Ити үлэҕэ сырыттаҕына комсомолец Никифоровы лейтенант куурсугар командировкалаабыттара, онно 3 ый үөрэнэн, үөрэҕин туйгуннук бүтэрбитэ уонна лейтенант аатын ылбыта. Кини байыастар уонна командирдар ортолоругар улахан авторитеттааҕын иһин бастаан взвод командирынан анаммыта. Сотору буолаат бэйэтин ротатын илдьэ фроҥҥа барбыта. Фронт инники линиятыгар боевой соругу толоро сылдьан Иннокентий Прокопьевич баас ылан госпиталга эмтэнэ сытан 1943 с. атырдьах ыйын 28 күнүгэр убайыгар маннык ис хоһоонноох суругу ыыппыта: » Тапталлаах убайым Исай Прокопьевич! Аан бастаан Кыһыл Армия кэккэтигэр сылдьар бииргэ төрөөбүт бырааккыттан боевой офицерскай приветтэ ыл! Күндү убайым! Эн итии кыһамньыгынан иитиллэн, улаатан, үөрэнэн Кыһыл Армия кэккэтигэр сулууспалыыр уонна советскай лейтенант аатын ылар дьоллоннум. Фронт инники линиятыгар төрөөбүт ийэ дойдум көмүскэлигэр сылдьан, бэйэм сатабылым уонна хорсун сырыым иһин правительстваттан » Кыһыл сулус» орденынан наградаланным. Мин билигин БСК(б)П членэбин. Ити барыта Эн, мин туспар кыһаммытыҥ түмүгэ буолар. Ол иһин бүгүн эйиэхэ махталбын тиэрдэбин Ытыктыыр убайым! Ыраах тыылга оргуйар үлэҕит туһунан суруйуҥ. Эҕэрдэни кытта эн быраатыҥ И. Никифоров.» 28.8.43 с. Иннокентий Прокопьевич ити суругун кэнниттэн сотору эмтэнэн үтүөрэн фроҥҥа иккиһин барбытын туһунан биллэрбитэ. Биһиги оройуон комсомолецтара уонна ыччаттара комсомол XXV сааһа туолар үбүлүөйүгэр комсомолец И.П. Никифоров немецкэй талабырдьыттары урусхаллааһыҥҥа боевой суоллары сылдьан » Кыһыл сулус» орденынан наградаламмытынан киэн тутталлар. Биһигини Иннокентий Никифоров эрдээх хорсун сырыылара партия правительства сорудахтарын туйгуннук толорорго ыҥырар.                                                                                                                 Н.Прокопьева.

Хаһыатка хайдах суруллубутунан бэчээттээн таһаарда Хоточчу олохтоох библиотека үлэһитэ Лира Яндреева.

Поделиться: