1,876 Общее количество просмотров,  1 Просмотров сегодня

«Булгунньахтаах» сопхуос республикаҕа үрдүк кирбиилэри ситиспитэ. Быйыл «Булгунньахтаах» сопхуос торуттэммитэ 50 сылынан “Булгунньахтаах” сопхуоһа: үлэҕэ албан аат» кинигэ бэчээттэнэн таҕыста.Кинигэни үлэ бэтэрээнэ Николай Филиппович Трофимов хомуйан оҥордо. Кинигэҕэ «Булгунньахтаах» сопхуоска үлэ бары салааларыгар үрдүк кирбиилэри ситиспит үлэһиттэр, сатабыллаах салайааччылар сырдатылыннылар. Манна элбэх биир дойдулаахтарбыт туһунан ахтыылар, хаартыскалар, хаһыакка тахсыбыт ыстатыйалар киирдилэр. Ытык үлэһит дьоммут көмүс көлөһүннэринэн ситиспит үрдүк ситиһиилэрэ умнууга хаалбакка, бар дьон болҕомтотугар тахсыбыта кэрэхсэбиллээх. Кинилэр ураты дьоҕурдарынан, кытаанах дьулуурдарынан элбэҕи ситиспиттэрэ, улууспутун аатырдыбыттара.
«Правда» холкуос базатыгар «Булгунньахтаах» сопхуос 1971 сыл алтынньы 16 күнүгэр икки нэһилиэк сирин-уотун хабан государственнай тэрилтэҕэ уларытан тэриллибитэ. Саҥа тэриллибит сопхуоска директорынан Петров Семен Фомич улэлээбитэ. «Булгунньахтаах» сопхуоска испииһэккэ 856 үлэһит киирбитэ. Олортон 258 эдэр ыччат комсомольскай тэрилтэҕэ, 107 үлэһит коммунистическай партия чилиэнинэн тураллара. 1961 сыллаахха орто оскуоланы бүтэрбит оҕолор «оскуола-үлэ-үрдүк үөрэх» диэн ыҥырыы таһааран холкуоска тутуспутунан үлэлии хаалбыттара. Салгыы 1971-1991 сыллардаахха орто оскуоланы бүтэрбит 544 оҕо производствоҕа быһаччы араас үлэлэргэ үлэлээбиттэрэ. Ыччаттары үөрэтэргэ, кинилэргэ көмөлөһөргө наставниктар үлэлээбиттэрэ. «Булгунньахтаах» сопхуос территориятыгар алта нэһилиэнньэлээх пууннар, үс нэһилиэк сэбиэттэрэ, икки орто оскуола бааллара.
Хаҥалас улууһун историятыгар «Булгунньахтаах» сопхуос ситиспит көрдөрүүлэрэ үрдүк, республикаҕа бастыҥнар истэригэр киирэрэ. Кинигэ ааҕааччы киэҥ араҥатыгар ананар.