1,853 Общее количество просмотров,  5 Просмотров сегодня

Кулун тутар 27 күнүгэр Аан дойдутааҕы Театр күнэ.
Аҕа дойду сэриитин сылларыгар, дьон санаатын көтөҕөн, самодеятельнай драмкуруһуоктар тэриллэн үлэлээбиттэрин туһунан 1944 с. кулун тутар 15 күнүгэр «Кыым» хаһыакка суруллубут.
«Художественнай самодеятельноһы көрүүнү олунньу 19—26 күннэригэр ыытылынна. Онно Булгунньахтaax, Нөөрүктээйи, 1 Дьөппөн, Качыкаат, Нөмүгү, уонна VI Малдьаҕар нэһилиэктэринээҕи самодеятельнай куруһуоктар кыттыыны ыллылар.
Олор истэригэр Булгунньахтаах
оскуолатынааҕы, 1 Дьөппөн уонна Нөөрүктээйи нэһилиэктэринээҕи драмкуруһуоктар биллэр үлэни оҥордулар. Манна оскуола дирек­тора, орденнаах Пелагея Никифо­рова салайааччылаах 1 Дьөппөн
нэһилиэгинээҕи толорута суох орто
оскуолата yoннa Тимошенко аатынан колхозтааҕы драмкуруһуок,
Суорун Омоллоон «Айаал» диэн
пьесатын туруоруута көрөөччүлэр
улахан биһирэбиллэрин ылла. Бу
пьеса 3 төгүл көрдөрүлүннэ.
Оонньооччулартан Айаалы— учуутал Р. Скороходкин уонна Күн-Чөмчүүгү—учительница, Дария Пестерева ордук ситиһиилээхтик толордулар. Ити курдук Булгунньахтаах
оскуолатынааҕы уонна Нөөрүктээйи нэһилиэгинээҕи Жданов аатынан колхоз драмкуруһуога С. Ефремов «Иэс» диэн пьесатын хас да төгүл туруордулар. Манна киирбит үп барыта фронтовиктар уонна интернат оҕолорун туһаларыгар бэрилиннэ».
Манна ахтыллар Роман Васильевич Скороходкин Аҕа дойду сэриитин кыттыылааҕа.
«Аҕа дойду сэриитин 2 степеннээх» уордьанынан наҕараадаламмыт, «Хорсунун иһин», «Бойобуой үтүөлэрин иһин» мэтээллэрдээх Саха АССР үтүөлээх учуутала, элбэх көлүөнэ дьону үөрэппит, кэрэҕэ-үтүөҕэ сирдээбит, 1-Дьөппөн оскуолатыгар өр сыл үлэлээбит учуутал.
Кэргэнинээн Дарья Осиповналыын нэһилиэкпит биир саамай киэн туттар, убаастанар, дьон-сэргэ ытыктабылын ылар, дьоһун саха ыала этэ.

Сурукка тистэ Хоточчу олохтоох библиотекатын үлэһитэ Лира Яндреева.